Nashik Kumbhmela | नाशिकमध्ये घाटांचे सुशोभीकरणाचे काम सुरु करताच पर्यावरणप्रेमी संतापले

सिहस्थ कुंभमेळ्याच्या पार्श्वभूमीवर नाशिकच्या गोदाघाट परिसरात विकासकामाला सुरुवात झाली आहे. प्रशासनाच्या वतीने घाटांचे सुशोभीकरण सुरू असून, याशिवाय परिसरातील घाटांची संख्या वाढवण्याचा प्रयत्न देखील केला जात आहे. सिहस्थ कुंभमेळ्यात कोट्यवधी भाविक, साधुमहंत यांचा येणारा विचार करता, प्रशासनाचा उद्देश भाविकांना गोदावरीत उभं राहून स्नान करण्याची सोय करणे हा आहे. या हेतूने घाटांची निर्मिती आणि सुधारणा करण्याचे काम सुरु करण्यात आले आहे.
तथापि, पर्यावरणप्रेमी आणि गोदावरी प्रेमींनी यावर आक्षेप नोंदवला आहे. त्यांचा दावा आहे की, काही वर्षांपूर्वीच गोदाघाटांचे पुनर्रचनेच्या नावाखाली काम करताना नदी प्रदूषित झाली होती आणि काही घाट तोडले गेले होते. आता हेच तोडलेले घाट पुन्हा उभारण्याचा प्रयत्न प्रशासनाकडून केला जात असल्याने पर्यावरणीय चिंता वाढली आहे. स्थानिक नागरिक प्रशासनाच्या या घाट निर्माण आणि वाढवण्याच्या धोरणावर प्रश्न उपस्थित करत आहेत. “गोदावरी प्रदूषित झाली होती, आता ती सुधारली आहे की नाही?” असा संतप्त सवाल देखील उपस्थित केला जात आहे.