Nanded Flood : गोदावरी नदीनं धोका पातळी ओलांडली, नवघाट परिसर पाण्याखाली, बघा नांदेडमधील गंभीर पूरस्थिती

नांदेडमध्ये गोदावरी नदीने धोक्याची पातळी ओलांडल्याने नवघाट परिसर पाण्याखाली गेला आहे. अनेक घरांमध्ये पाणी शिरले असून, सध्या विष्णुपुरी प्रकल्पातून २ लाख ९८ हजार क्युसेक पाणी गोदावरी नदीपात्रात सोडण्यात येत आहे. गेल्या दोन दिवसांपासून नदी धोक्याची पातळी ओलांडून वाहत आहे.

नांदेड शहराच्या अनेक भागांत पाणी शिरले असून, महानगरपालिकेच्या अग्निशामक दलाच्या जवानांनी कालपासून जवळपास ५० ते ६० लोकांना सुरक्षित स्थळी हलवले आहे. रात्री १२ ते १ वाजेपर्यंत हे मदतकार्य सुरू होते. स्थानिक नागरिकही तराफ्याच्या माध्यमातून नागरिकांना मदत करत आहेत.

वसर्णी आणि नवघाटला जोडणारा पूल पाण्याखाली गेला आहे, ज्यामुळे अनेक संसारोपयोगी वस्तूंचे नुकसान झाले आहे. काल नांदेड जिल्ह्यात ऑरेंज अलर्ट जारी करण्यात आला होता, परिणामी मोठा पाऊस झाला. शहरी भागासोबतच ग्रामीण भागातही लाखो हेक्टर शेतीचे मोठे नुकसान झाले आहे.