LPG Crisis | गॅस तुटवड्यावर पेट्रोलियम मंत्रालयाची पत्रकार परिषद; देशात मोठा तुटवडा नसल्याचा दावा

मध्यपूर्वेत सुरू असलेल्या इस्त्रायल-इराण संघर्षाच्या पार्श्वभूमीवर जगभरात ऊर्जा संकटाची परिस्थिती निर्माण झाली आहे. या परिस्थितीचा परिणाम एलपीजी गॅसच्या पुरवठ्यावरही होत असल्याची चर्चा सुरू आहे. याच पार्श्वभूमीवर केंद्र सरकारच्या पेट्रोलियम आणि नैसर्गिक वायू मंत्रालयाने पत्रकार परिषद घेत देशातील गॅस पुरवठ्याबाबत माहिती दिली आहे. मंत्रालयाने स्पष्ट केले की देशात एलपीजीचा मोठा तुटवडा नाही आणि नागरिकांनी घाबरून गॅस बुकिंग करण्याची गरज नाही. घरगुती वापरासाठी गॅसचा पुरवठा नियमित पद्धतीने सुरू असून वितरण व्यवस्थेवर सतत लक्ष ठेवले जात आहे. मंत्रालयाच्या अधिकाऱ्यांनी सांगितले की, उपलब्ध एलपीजीचा पुरवठा प्रामुख्याने घरगुती ग्राहकांना प्राधान्याने दिला जात आहे. रुग्णालये आणि शैक्षणिक संस्था यांसारख्या अत्यावश्यक क्षेत्रांनाही गॅस पुरवठा दिला जात आहे. तसेच नव्या स्रोतांमधून एलएनजी कार्गो खरेदी करण्यात आले असून दोन मोठे कार्गो भारताकडे येत असल्याची माहितीही देण्यात आली. दरम्यान, मागणी व्यवस्थापनासाठी सरकारने काही तात्पुरते उपाय केले आहेत. गॅस बुकिंगमधील किमान अंतर 25 दिवसांवरून वाढवून 45 दिवस करण्यात आले आहे, जेणेकरून उपलब्ध गॅस सर्व ग्राहकांपर्यंत पोहोचू शकेल. याशिवाय, जागतिक तणावाच्या पार्श्वभूमीवर व्यावसायिक गॅसच्या साठ्यातील काही भाग नियंत्रित पद्धतीने वाटप करण्याचा निर्णयही घेण्यात आला आहे, ज्यामुळे बाजारात होणारी साठेबाजी आणि तुटवडा टाळता येईल. मंत्रालयाने नागरिकांना आवाहन केले आहे की गॅसचा साठा करण्याऐवजी नियमित पद्धतीनेच बुकिंग करावे. सरकार परिस्थितीवर बारकाईने लक्ष ठेवून असून देशातील गॅस पुरवठा सुरळीत ठेवण्यासाठी सर्व आवश्यक उपाययोजना करण्यात येत असल्याचा विश्वासही यावेळी व्यक्त करण्यात आला.