मुंबईत गोंधळ केलेला चालणार नाही, तुम्हाला…ठाकरे बंधूंच्या मोर्चावर सदावर्तेंचा थेट इशारा

गुणरत्न सदावर्ते यांनी राज ठाकरे आणि उद्धव ठाकरे यांच्या नेतृत्वाखालील शिवसेनेने ४ ऑक्टोबर रोजी पुकारलेल्या मुंबईतील जनमोर्चाला नाटक असे संबोधत तीव्र शब्दांत टीका केली आहे. राज ठाकरे यांचा ४ ऑक्टोबरचा हा कार्यक्रम मुंबईत चालणार नाही, असे सदावर्ते यांनी स्पष्टपणे म्हटले आहे. या आंदोलनामुळे मुंबईत कोणताही गोंधळ निर्माण होऊ देणार नाही, तसेच लोकांना कोणताही त्रास होऊ दिला जाणार नाही, अशी भूमिका सदावर्ते यांनी घेतली आहे.

मनसे आणि ठाकरेंची शिवसेना यांनी मुख्य निवडणूक आयुक्त ज्ञानेश कुमार यांच्या विरोधात ४ ऑक्टोबरला मुंबईत जनमोर्चा काढण्याची घोषणा केली आहे. याच घोषणेवरून गुणरत्न सदावर्ते यांनी आपली प्रतिक्रिया व्यक्त केली आहे. सदावर्ते यांच्या मते, राज ठाकरे यांच्या वल्गनांना फारशी किंमत नसते, कारण त्यांचे भांड फुटलेले असते आणि कायदेशीर मार्गाने गेल्यास हे लगेचच मागे हटतात. त्यांनी म्हटले आहे की, मुंबई बंद पाडून किंवा रस्ते अडवून सामान्य नागरिकांना त्रास देण्याचा कोणताही प्रयत्न खपवून घेतला जाणार नाही. राज ठाकरे असो किंवा त्यांची ही जोडगोळी, त्यांचे पितळ उघडे पाडले जाईल, असा कडक इशाराही सदावर्ते यांनी दिला आहे. मुंबईच्या शांततेला आणि जनजीवनाला बाधा पोहोचवणाऱ्या कोणत्याही कृतीला विरोध केला जाईल, असे त्यांचे म्हणणे आहे.