Gadchiroli | गडचिरोलीत उष्णतेचा कहर; ट्रान्सफॉर्मर जळाले, वीजपुरवठा खंडित…

गडचिरोली जिल्ह्यात वाढत्या तापमानामुळे जनजीवन विस्कळीत होत असल्याचे चित्र समोर आले आहे. प्रखर उष्णतेमुळे रस्ते ओस पडले असून नागरिक घराबाहेर पडणे टाळत आहेत. तापमानाचा मोठा फटका केवळ नागरिकांनाच नव्हे, तर विद्युत पुरवठा व्यवस्थेलाही बसत आहे. उष्णतेमुळे अनेक ठिकाणी वीजपुरवठा खंडित होत असून, काही भागांमध्ये ट्रान्सफॉर्मर जळाल्याच्या घटनाही समोर आल्या आहेत. परिणामी, वीज वितरण विभागाकडून तातडीने दुरुस्तीचे काम हाती घेण्यात आले आहे. काही ठिकाणी नवीन ट्रान्सफॉर्मर बसवण्याचे काम सुरू असून, विद्यमान ट्रान्सफॉर्मरचे तापमान नियंत्रणात ठेवण्यासाठी विशेष उपाययोजना केल्या जात आहेत. यामध्ये ट्रान्सफॉर्मर थंड ठेवण्यासाठी कुलरचा वापर केला जात असून, सततच्या उष्णतेमुळे उपकरणांवर ताण येऊ नये यासाठी प्रयत्न सुरू आहेत. दरम्यान, वाढत्या तापमानामुळे वीजवाहिन्यांवरही परिणाम होत असल्याने पुरवठा सुरळीत ठेवणे हे मोठे आव्हान बनले आहे. प्रशासनाकडून नागरिकांना संयम बाळगण्याचे आवाहन करण्यात आले आहे.