Hema Malini | आंदोलन करून काही होणार नाही शांततेच्या मार्गाने… CJP आंदोलनावर हेमा मालिनी यांचं मोठं विधान

दिल्लीत सुरू असलेल्या CJP आंदोलनावर भाजप खासदार हेमा मालिनी यांनी प्रतिक्रिया दिली आहे. आंदोलनाच्या पार्श्वभूमीवर त्यांनी विद्यार्थी आणि आंदोलनकर्त्यांना शांततेच्या मार्गाने संवाद साधण्याचे आवाहन केले आहे. माध्यमांशी बोलताना हेमा मालिनी म्हणाल्या की, कोणत्याही प्रकारची अडचण किंवा समस्या असल्यास ती आंदोलनाच्या माध्यमातून नव्हे, तर चर्चेच्या माध्यमातून सोडवली पाहिजे. “अशा प्रकारे आंदोलन करून काहीही साध्य होणार नाही. संबंधित प्रश्नांवर सरकारसोबत संवाद साधणे अधिक योग्य ठरेल,” असे त्या म्हणाल्या.

यावेळी त्यांनी केंद्र सरकारची भूमिका स्पष्ट करत, देशातील युवक आणि शैक्षणिक संस्थांसोबत पंतप्रधान नरेंद्र मोदी यांच्या नेतृत्वाखालील सरकार कायम उभे असल्याचे सांगितले. विद्यार्थ्यांच्या हितासाठी सरकार सकारात्मक असून, त्यांच्या समस्या सोडवण्यासाठी आवश्यक ते प्रयत्न केले जातील, असा विश्वासही त्यांनी व्यक्त केला.

दरम्यान, दिल्लीतील CJP आंदोलनाला देशभरातून विविध राजकीय पक्ष आणि संघटनांचा पाठिंबा मिळत असताना, हेमा मालिनी यांच्या या वक्तव्यानंतर आंदोलनावरून राजकीय प्रतिक्रिया अधिक तीव्र होण्याची शक्यता व्यक्त केली जात आहे.