Womens World Cup Final : आफ्रिकेला नमवणार, वर्ल्डकप आणणार; महिला विश्वचषकाचा आज रंगणार अंतिम सामना

नवी मुंबईच्या डी.वाय. पाटील स्टेडियमवर आज महिला एकदिवसीय विश्वचषकाच्या अंतिम सामन्याचा थरार अनुभवायला मिळणार आहे. या महत्त्वपूर्ण सामन्यात भारत आणि दक्षिण आफ्रिका हे संघ विजेतेपदासाठी आमनेसामने उभे ठाकणार आहेत. क्रिकेट जगताचे लक्ष या सामन्याकडे लागले आहे, कारण दोन्ही संघ पहिल्यांदाच अंतिम फेरीत पोहोचले असल्याने या स्पर्धेला एक नवा विश्वविजेता मिळणार आहे.

भारतीय महिला संघाने यापूर्वी दोन वेळा (२००५ आणि २०१७ साली) विश्वचषकाच्या अंतिम सामन्यात धडक मारली होती, परंतु दोन्ही वेळा त्यांना पराभवाला सामोरे जावे लागले. आता कर्णधार हरमनप्रीत कौरच्या नेतृत्वाखालील भारतीय संघाला इतिहास रचण्याची तिसरी संधी मिळाली आहे.

ऑस्ट्रेलियाविरुद्धच्या उपांत्य सामन्यात हरमनप्रीत आणि जेमिमा रॉड्रिग्जने केलेल्या दमदार खेळीची पुनरावृत्ती करण्याची अपेक्षा चाहत्यांना आहे. यापूर्वी ऑस्ट्रेलियाने सात वेळा, इंग्लंडने चार वेळा, तर न्यूझीलंडने एकदा हा विश्वचषक जिंकला आहे. भारताला साखळी फेरीत दक्षिण आफ्रिकेकडून पराभव पत्करावा लागला असल्याने, अंतिम सामन्यात आफ्रिकेचे कडवे आव्हान भारतीय संघासमोर उभे आहे.