Maharashtra Rain Alert : राज्यात पुन्हा पावसाची बॅटिंग, आज ‘या’ 6 जिल्ह्यात धुव्वाधार, IMD कडून रेड अलर्ट

हवामान विभागाने महाराष्ट्रातील सहा जिल्ह्यांसाठी रेड अलर्ट जारी केला आहे. मुंबई, ठाणे, नाशिक, पालघर, रायगड आणि पुणे या जिल्ह्यांमध्ये आज मुसळधार ते अतिमुसळधार पावसाची शक्यता वर्तवण्यात आली आहे. नागरिकांना विशेष खबरदारी घेण्याचे आवाहन करण्यात आले आहे. याव्यतिरिक्त, राज्यातील इतर पाच जिल्ह्यांना ऑरेंज अलर्ट देण्यात आला आहे. यात रत्नागिरी, सातारा, कोल्हापूर, सांगली आणि छत्रपती संभाजीनगर यांचा समावेश आहे. या जिल्ह्यांमध्येही पावसाचा जोर वाढण्याची शक्यता असून, संबंधित प्रशासनाने आवश्यक उपाययोजना करण्यास सुरुवात केली आहे. हवामान विभागाच्या या इशाऱ्यामुळे राज्यभरात पावसाच्या पार्श्वभूमीवर सतर्कतेचे वातावरण निर्माण झाले आहे. पूर आणि जलमय परिस्थिती टाळण्यासाठी प्रशासकीय यंत्रणा सज्ज झाली आहे.