Putins India Visit: पुतीन भारतात, दोस्ती दमदार.. रशियाचे राष्ट्राध्यक्ष दोन दिवसीय दौऱ्यावर.. भारतासाठी ठरणार महत्त्वाचा?

रशियाचे राष्ट्राध्यक्ष व्लादिमीर पुतिन भारताच्या दोन दिवसीय दौऱ्यावर दाखल झाले आहेत. दिल्ली विमानतळावर पंतप्रधान नरेंद्र मोदी यांनी त्यांचे स्वागत केले. भारत आणि रशिया या दोन्ही देशांसाठी हा दौरा अत्यंत महत्त्वाचा मानला जात आहे. या दौऱ्यात दोन्ही देशांमध्ये जवळपास आठ महत्त्वाचे करार होणार असल्याची माहिती आहे. या करारांमध्ये एसयू-57 स्टेल्थ फायटर जेट करार, लॉजिस्टिक सपोर्ट संरक्षण करार आणि सिक्युरिटी ऑपरेशन कराराचा समावेश आहे.

याव्यतिरिक्त, व्यापार, ऊर्जा, कृषी, फार्मास्युटिकल आणि हेल्थ केअर क्षेत्रांमध्येही महत्त्वपूर्ण सहकार्य करार अपेक्षित आहेत. या भेटीमुळे भूराजकीय परिस्थिती लक्षात घेता रशिया भारताच्या आणखी जवळ येईल आणि भारताचे स्ट्रॅटेजिक ऑटोनॉमीचे धोरण अधिक बळकट होईल असे दिसून येते. दरम्यान, विरोधी पक्षनेते राहुल गांधी यांनी मोदी सरकारवर परदेशी पाहुण्यांना विरोधी पक्षनेत्यांशी भेटू न दिल्याचा आरोप करत सरकारमध्ये असुरक्षितता असल्याचा दावा केला आहे.