दम धरा, सगळं होईल, डाव सगळे होतील! मनोज जरांगेंचा छगन भुजबळांना थेट इशारा

मराठा आरक्षणाच्या मुद्द्यावरून राज्यात राजकीय घडामोडींना वेग आला असताना, मराठा आंदोलक मनोज जरांगे पाटील यांनी राज्याचे मंत्री छगन भुजबळ यांच्यावर तीव्र शब्दांत टीका केली आहे. भुजबळ यांची राजकीय भूमिका दुटप्पी असून ती वेळोवेळी बदलते, असा थेट आरोप जरांगे पाटील यांनी केला आहे. उतरती कळा लागली की असंच होतं, अशा शब्दांत त्यांनी भुजबळांवर निशाणा साधला.

मनोज जरांगे पाटील यांनी छगन भुजबळ यांच्या राजकीय कार्यपद्धतीवर प्रश्नचिन्ह उपस्थित केले. ते म्हणाले की, “सोयीचं असलं की लगेच लाँग मार्च काढायचा, आणि सोयीचं नसलं तर बाजूला राहायचं. स्वतःला काही राजकीय अस्तित्व निर्माण करायचं असलं किंवा पोळी भाजून घ्यायची असली की लगेच लाँग मार्च काढला जातो.” भुजबळ यांच्या या दुटप्पी वागण्यावर त्यांनी आश्चर्य व्यक्त केले.

जरांगे पाटील यांनी भुजबळांना उद्देशून म्हटले की, “दम धरा, थोडा दम धरा आणखी. सगळं होईल, डाव सगळे होतील.” त्यांच्या या विधानामुळे मराठा आरक्षणाच्या राजकारणात नव्याने चर्चेला सुरुवात झाली आहे. भुजबळ यांच्या बदलत्या भूमिकांवर जरांगे पाटील यांनी केलेली ही टीका आता राजकीय वर्तुळात चर्चेचा विषय बनली आहे. या आरोपांमुळे मराठा आरक्षण आंदोलनाभोवतीच्या राजकीय घडामोडींना आणखी धार येण्याची शक्यता आहे.