मोठी बातमी! पेट्रोलमध्ये 20% नव्हे, तर तब्बल 31% इथेनॉल; कर्नाटक सरकारच्या आरोपाने खळबळ

पेट्रोलमध्ये 20% नव्हे, तर तब्बल 31% इथेनॉल मिसळण्यात आल्याचा गंभीर आरोप कर्नाटक सरकारने केला आहे. कर्नाटकच्या विविध जिल्ह्यांमधून गोळा केलेल्या पेट्रोलच्या नमुन्यांची तपासणी केल्यानंतर हा धक्कादायक अहवाल समोर आला आहे. केंद्र सरकारने E20 पेट्रोलमध्ये केवळ 20% इथेनॉल मिसळण्यास परवानगी दिली असताना, प्रत्यक्षात त्याहून अधिक इथेनॉल आढळल्याचे कर्नाटक सरकारचे म्हणणे आहे. कर्नाटक सरकारने बंगळूरु, कोलार, चिकबल्लापूर, बंगळूरु ग्रामीण, रामनगर, मंगळूरु आणि तुमकर या सात जिल्ह्यांमधून पेट्रोलचे 14 नमुने घेतले. बंगळूरु येथील श्रीराम रिसर्च इन्स्टिट्यूटमध्ये या नमुन्यांची तपासणी करण्यात आली.

अहवालानुसार, 14 पैकी 11 नमुन्यांमध्ये इथेनॉलचे प्रमाण 20 टक्क्यांपेक्षा जास्त आढळले. इंडियन ऑईलच्या एका नमुन्यात 31.2% आणि हिंदुस्तान पेट्रोलियमच्या एका नमुन्यात 30.5% इथेनॉल सापडले. या अहवालानंतर कर्नाटक सरकारने तेल कंपन्यांवर कठोर कारवाई करण्याची आणि वाहन मालकांना भरपाई देण्याची मागणी केंद्र सरकारकडे केली आहे. दुसरीकडे, पेट्रोलियम कंपन्यांनी कर्नाटक सरकारचे हे दावे फेटाळून लावले आहेत. वाहनचालक महागडे पेट्रोल खरेदी करत असताना, त्यांना नेमकं काय मिळत आहे, हा प्रश्न यानिमित्ताने उपस्थित झाला आहे.