पंकजा मुंडेंच्या कार्यकर्त्यांकडून जीवे मारण्याची धमकी! करुणा शर्मांचा गंभीर आरोप

करुणा शर्मांनी पंकजा मुंडेंच्या कार्यकर्त्यांकडून जीवे मारण्याची धमकी मिळाल्याचा गंभीर आरोप केला आहे. त्यांच्या म्हणण्यानुसार, पंकजा मुंडेंवरील व्हिडिओ करू नको असे त्यांना सांगितले गेले. याशिवाय, “मला धमकी देण्यापेक्षा काम करा,” असेही करुणा शर्मा म्हणाल्या आहेत.

करुणा शर्मांनी आरोप केला आहे की, पंकजा मुंडेंच्या कार्यकर्त्यांनी फोन करून त्यांना शिवीगाळ केली आणि जीवे मारण्याची धमकी दिली. पंकजा मुंडे आणि धनंजय मुंडे यांच्या विरोधात व्हिडिओ बनवणे बंद न केल्यास संपवून टाकण्याची धमकी मिळाल्याचे त्यांनी नमूद केले. दोन दिवसांपूर्वी रात्री १२ वाजता पंकजा पालवे यांच्या एका कार्यकर्त्याचा कॉल आला होता, त्याने शिवीगाळ करत जीवे मारण्याची धमकी दिली आणि पंकजा ताईबद्दल किंवा धनंजय मुंडेंबद्दल व्हिडिओ न बनवण्यास सांगितले, असा दावा करुणा शर्मांनी केला.

करुणा शर्मांनी पंकजा मुंडेंना आव्हान दिले आहे की, “मला धमकावण्यापेक्षा काम करून दाखवा.” त्यांनी मोठ्या भ्रष्टाचाराचा आरोप करत चिक्की आणि मोबाईल घोटाळ्यांचाही उल्लेख केला. “फक्त जातीपातीचे राजकारण करून स्वतःची पोळी भाजून मोठे मोठे भ्रष्टाचार करणारे हे लोक आहेत,” असे करुणा मुंडे म्हणाल्यात. या सर्व गोष्टी त्यांना त्यांच्या पतीने सांगितल्याचेही त्यांनी म्हटले.