Ketan Agarwal Case : केतन अग्रवाल प्रकरणात मोठी अपडेट; तुलाही केतनसारखं… प्रत्यक्षदर्शीला थेट..

केतन अग्रवाल हत्या प्रकरणात एक धक्कादायक माहिती समोर आली आहे. आरोपी चेतनने या प्रकरणातील एका प्रत्यक्षदर्शीला जीवे मारण्याची धमकी दिली होती, असे सूत्रांकडून मिळालेल्या माहितीनुसार उघड झाले आहे. केतनला ढकलून दिल्याच्या घटनेबाबत प्रत्यक्षदर्शीने विचारणा केली असता, चेतनने त्याला धमकावले होते.

पोलिसांनी दिलेल्या माहितीनुसार, चेतनने प्रत्यक्षदर्शीला “तू शांत बस, नाहीतर तुलाही केतनसारखे पिलरवरून फेकून देईन” अशी धमकी दिली होती. या धमकीमुळे घाबरलेल्या साक्षीदाराला ताप आला आणि तो पाच दिवस भीतीने घरीच बसून राहिला. मात्र, माध्यमांतील बातम्यांनंतर धैर्य एकवटून त्याने पोलिसांशी संपर्क साधला आणि आपला जबाब नोंदवला.

या तपासात पुणे पोलिसांनी चेतनकडून सहा मोबाईल फोन आणि नऊ पेनड्राइव्ह जप्त केले आहेत. तसेच, १२ टीबी इतका मोठा डिजिटल डेटाही पोलिसांच्या हाती लागला आहे. प्रत्यक्षदर्शीचा जबाब आणि हे डिजिटल पुरावे या प्रकरणाच्या तपासात अत्यंत महत्त्वाचे ठरणार आहेत, अशी माहिती तपास अधिकाऱ्यांनी दिली. हे पुरावे चेतन आणि एका चार्टर्ड अकाऊंटंटच्या भूमिकेवर प्रकाश टाकतील अशी शक्यता आहे.