Kumbh Mela | बनावट सही, बनावट वर्क ऑर्डर अन् कोट्यवधींची फसवणूक! कुंभमेळ्याच्या नावाने नेमकं काय घडलं?

कुंभमेळ्याच्या नावाने बनावट वर्क ऑर्डर तयार करून मोठी आर्थिक फसवणूक केल्याचा धक्कादायक प्रकार समोर आला आहे. विभागीय आयुक्तांच्या बनावट स्वाक्षरीचा वापर करून तब्बल 5,091 कोटी रुपयांची कामे मंजूर झाल्याचे भासवण्यात आले आणि त्याआधारे बनावट वर्क ऑर्डर तयार करण्यात आल्या.

या प्रकरणात आरोपींनी विविध कामांचे कंत्राट मिळवून देण्याचे आमिष दाखवत तब्बल 3 कोटी 5 लाख रुपये उकळल्याचे**पोलिसांच्या तपासात समोर आले आहे. कुंभमेळ्याच्या पार्श्वभूमीवर हाऊसकीपिंगसह विविध प्रकारची कामे असल्याचे दाखवून संबंधितांची फसवणूक करण्यात आली.

या प्रकरणाचा तपास करताना पोलिसांनी कारवाई करत तीन आरोपींना अटक केली आहे. आरोपींकडून बनावट कागदपत्रे आणि वर्क ऑर्डरच्या माध्यमातून फसवणुकीचे हे संपूर्ण रॅकेट चालवले जात असल्याचे तपासात उघड झाले आहे.

दरम्यान, या प्रकरणात प्रशासनातील कोणत्याही अधिकाऱ्याचा सहभाग आढळून आलेला नसल्याचे पोलिसांनी स्पष्ट केले आहे. तसेच या फसवणूक प्रकरणामागे कोणत्याही मोठ्या व्यक्तीचा किंवा प्रभावशाली व्यक्तीचा संबंध आढळलेला नसल्याचेही पोलिसांकडून सांगण्यात आले आहे.

कुंभमेळ्याच्या नावाने एवढ्या मोठ्या रकमेची बनावट कामे दाखवून वर्क ऑर्डर काढण्यात आल्याने या प्रकरणाची मोठी चर्चा सुरू झाली आहे. अटक करण्यात आलेल्या आरोपींच्या चौकशीतून या फसवणुकीमागील आणखी कोणाची भूमिका आहे का आणि बनावट कागदपत्रांचा वापर नेमका कुठे करण्यात आला, याबाबत अधिक माहिती समोर येण्याची शक्यता आहे.