Girish Mahajan | महाराष्ट्राच्या विविध भागांमध्ये दुष्काळाची गंभीर परिस्थिती, CM फडणवीसांचे तातडीचे आदेश

लातूर जिल्ह्यासह महाराष्ट्राच्या विविध भागांमध्ये दुष्काळाची गंभीर परिस्थिती निर्माण झाली आहे. लातूरच्या देवणी तालुक्यात सोयाबीन पिकाचे मोठे नुकसान झाले असून, उन्हाची तीव्रता आणि पावसाअभावी शेकडो एकरवरील सोयाबीन पूर्णपणे करपले आहे. यामुळे शेतकऱ्यांच्या हातातोंडाशी आलेला घास हिरावला गेला असून, ते आर्थिक संकटात सापडले आहेत. अनेक गावांमध्ये पाण्याची तीव्र टंचाई जाणवत आहे. शेतकरी सध्या प्रशासनाकडे दुष्काळ जाहीर करण्याची आणि तातडीने आर्थिक मदत देण्याची मागणी करत आहेत. लातूर जिल्ह्यातील विविध तहसील कार्यालयांवर मोर्चे आणि आंदोलने करून ते आपला आवाज सरकारपर्यंत पोहोचवत आहेत.

या गंभीर परिस्थितीची दखल घेत मुख्यमंत्री महोदयांनी राज्यातील नुकसानग्रस्त भागांमध्ये सरसकट पंचनामे करण्याचे आदेश दिले आहेत. मराठवाडा, विदर्भ आणि उत्तर महाराष्ट्रातील काही भागांमध्येही पिकांची स्थिती चिंताजनक असल्याचे म्हटले जात आहे. शासनाने यापूर्वीही अतिवृष्टीमुळे संकटात सापडलेल्या शेतकऱ्यांना भरीव मदत केली होती, त्याच धर्तीवर आता दुष्काळग्रस्तांनाही दिलासा मिळण्याची अपेक्षा आहे.