Mahadev Jankar : आई शप्पथ सांगतो… कमळाला मतदान करू नका, त्याची नियत अन् निती… जानकर काय बोलून गेले?

सांगली येथे बोलताना महादेव जानकर यांनी भारतीय जनता पार्टीच्या धोरणांवर कडक शब्दात टीका केली. त्यांच्या मते, भाजपची नियत आणि नीती त्यांना चांगलीच माहीत आहे. जानकर यांनी असा दावा केला की, जनतेला आरक्षणाचे गाजर मिळणार नाही, तर खाजगीकरण केले जाईल आणि त्यांना हद्दपार केले जाईल. देशातील शिक्षण व्यवस्था पूर्णपणे संपवली गेली असून, भारताला नोबेल पारितोषिक का मिळत नाही, असा प्रश्न त्यांनी उपस्थित केला.

जानकर यांनी भाजपवर समाजात भांडणे लावण्याचा आणि जनतेला त्यांच्या भागीदारीपासून दूर करण्याचे पाप केल्याचा आरोप केला. त्यांनी मतदारांना हात जोडून विनंती केली की, “कुणालाही मतदान द्या, पण त्या कमळाला तेवढे मतदान देऊ नका.” त्यांनी स्पष्ट केले की, हे आवाहन कोणत्याही वैयक्तिक स्वार्थासाठी नाही, ना त्यांनी साखर कारखाना किंवा सूतगिरणी मागितली आहे. आपली अवस्था सध्याचे शिंदे आणि अजित पवार यांच्यासारखी नसल्याचेही त्यांनी नमूद केले. ते म्हणाले की, ते शेतकरी, वंचित आणि गोरगरिबांसाठी काम करण्याचा प्रयत्न करतील आणि जाती-जातीमध्ये भांडणे लावण्याचे पाप करणार नाहीत.