लाडकी बहिणीच्या सुरक्षितेकडे सरकारचं दुर्लक्ष; वडेट्टीवारांची टीका

महाविकास आघाडीच्या पत्रकार परिषदेत विजय वडेट्टीवार यांनी राज्य सरकारवर महिला आणि अल्पवयीन मुलींच्या सुरक्षेकडे दुर्लक्ष केल्याचा गंभीर आरोप केला. त्यांनी सादर केलेल्या आकडेवारीनुसार, 2021 ते मार्च 2025 या कालावधीत लहान मुलींवरील अत्याचाराचे एकूण 37,000 गुन्हे दाखल झाले आहेत. तसेच, अल्पवयीन मुलींवरील अत्याचारात महाराष्ट्राचा देशात पहिला क्रमांक लागला आहे. दररोज सरासरी 24 अल्पवयीन मुली छेडछाड किंवा अत्याचाराला बळी पडत असल्याचे त्यांनी सांगितले.

वडेट्टीवार यांनी कायदा-सुव्यवस्थेच्या स्थितीवरही प्रश्नचिन्ह उपस्थित केले, संतोष देशमुख हत्या प्रकरणातील आरोपी अजूनही फरार असल्याचे आणि सोमनाथ सूर्यवंशी आत्महत्या प्रकरणात पोलिसांवर कारवाई न झाल्याचे निदर्शनास आणून दिले. त्यांनी पुणे शहर गुन्हेगारीचे केंद्र बनत असल्याचा दावा करत, सरकारचा पोलिसांना पाठीशी घालण्याचा आरोप केला. याशिवाय, विदर्भाकडे दुर्लक्ष, वाढते कर्ज आणि मानवी-वन्यजीव संघर्षात वाढलेल्या मृत्यूंवरही त्यांनी चिंता व्यक्त केली.