Maharashtra Election 2026 : पुणेकर सुज्ञ अन् जानकार… मोहोळ यांनी विश्वास व्यक्त करत मतदारांना काय केलं आवाहन?

भाजप नेते मुरलीधर मोहोळ यांनी पुणे शहराच्या विकासासाठी केलेल्या कामांचा उल्लेख करत पुणेकरांच्या भविष्यातील समर्थनाबद्दल विश्वास व्यक्त केला आहे. 2017 ते 2022 या काळात केलेल्या कामामुळेच 2024 च्या विधानसभा आणि लोकसभेच्या निवडणुकांमध्ये पुणेकरांनी पुन्हा काम करण्याची संधी दिल्याचे त्यांनी म्हटले. भारतीय जनता पक्षाच्या नेतृत्वावर पुणेकरांचा विश्वास कायम राहील, असा विश्वास मोहोळ यांनी व्यक्त केला. यासोबतच त्यांनी पुणेकरांना एक महत्त्वपूर्ण आवाहन केले. संविधानाने दिलेल्या मतदानाच्या अधिकाराचा वापर करून जास्तीत जास्त नागरिकांनी घराबाहेर पडून मतदान करावे असे ते म्हणाले. मागील निवडणुकीत अजित पवार यांच्या विरोधात झालेल्या सामन्याचा संदर्भ देत, मोहोळ यांनी वैयक्तिक टीका टाळल्याचे सांगितले. पुणेकर हे सुज्ञ आणि जाणकार मतदार असून, ते विचारपूर्वक निर्णय घेतात. त्यामुळे कुठल्याही खालच्या स्तरावरील टीकेला महत्त्व न देता पुणेकर योग्य निवड करतील, असा विश्वास त्यांनी व्यक्त केला.