मी काही समोर आणलं तर नार्वेकरांना राजीनामा द्यावा लागेल! राऊतांनी स्पष्टच सांगितलं

संजय राऊत यांनी महाराष्ट्र विधानसभा अध्यक्ष राहुल नार्वेकर यांच्यावर अलिबाग येथील जमीन खरेदीच्या प्रकरणावरून गंभीर आरोप करत त्यांना थेट राजीनाम्याची मागणी केली आहे. राऊत यांनी एक व्हिडिओ ट्विट करत नार्वेकरांसमोर अलिबागच्या म्हात्रोळी गावात झालेल्या हाणामारीच्या घटनेकडे लक्ष वेधले. “मी आणखी काही माहिती उघड केल्यास विधानसभा अध्यक्षांना राजीनामा द्यावा लागेल,” असा इशारा राऊत यांनी दिला आहे.

राऊत यांच्या आरोपानुसार, गुजरातच्या जिक्सा शहा यांनी अलिबागमध्ये मोठ्या प्रमाणावर जमीन खरेदी केली असून, या व्यवहारात नार्वेकरांचा सहभाग आहे. जिक्सा शहा हे क्वालिटी कौन्सिल ऑफ इंडियाचे अध्यक्ष असून ते अहमदाबादचे आणि अमित शहा व जय शहा यांच्या जवळचे असल्याचे राऊत यांनी म्हटले आहे. नार्वेकरांनी या व्हिडिओनंतर स्पष्टीकरण दिले होते की, ते कौटुंबिक वाद सोडवण्यासाठी गेले होते आणि त्यांचा घटनेशी संबंध नव्हता. मात्र, राऊत यांनी नार्वेकर सरकारी अधिकाऱ्याला मारहाण होत असताना घटनास्थळावरून पळून गेल्याचा आरोप केला आहे. यामुळे राजकीय वर्तुळात नवा वाद निर्माण झाला आहे.