tv9 Marathi Special Report | Malegaon | मालेगाव महापालिकेत नमाज पठणाचा व्हिडिओ व्हायरल; निषेधार्थ हनुमान चालिसाचे पठण, राजकीय वातावरण तापले

कायम चर्चेत असलेल्या मालेगाव महानगरपालिका पुन्हा एकदा वादाच्या भोवऱ्यात सापडली आहे. महापालिकेच्या कार्यालयात नमाज पठण केल्याचा एक व्हिडिओ सोशल मीडियावर व्हायरल झाल्यानंतर शहरातील राजकीय वातावरण तापले आहे. या घटनेनंतर हिंदुत्ववादी संघटना आणि भारतीय जनता पक्ष आक्रमक झाले आहेत. महापालिकेच्या कार्यालयात नमाज पठण झाल्याच्या निषेधार्थ हिंदुत्ववादी कार्यकर्त्यांनी आयुक्तांच्या दालनात हनुमान चालिसाचे पठण केले. दरम्यान, लोक संघर्ष समितीने शहरातील पथदिव्यांच्या समस्येबाबत महापालिकेकडे वारंवार तक्रारी केल्या होत्या. मात्र तक्रारींकडे दुर्लक्ष होत असल्याचा आरोप करत संघर्ष समितीचे कार्यकर्ते विद्युत विभागाच्या अधीक्षकांना भेटण्यासाठी महापालिकेत आले होते. अधिक्षक बैठकीसाठी बाहेर गेल्याने कार्यकर्ते त्यांच्या दालनातच थांबले. अधिक्षक येण्यास विलंब झाल्याने आणि त्याचवेळी नमाजची वेळ झाल्याने दालनातच नमाज पठण करण्यात आल्याचा दावा संघर्ष समितीच्या कार्यकर्त्यांनी केला आहे. या प्रकरणाची तक्रार भाजपचे नेते किरिट सोमय्या यांनी थेट मुख्यमंत्र्यांकडे केल्याची माहिती आहे. तसेच दोन दिवसांत नमाज पठण करणाऱ्यांवर गुन्हा दाखल न झाल्यास महापालिकेचे गोमूत्राने शुद्धीकरण करण्याचा इशारा हिंदुत्ववादी कार्यकर्त्यांनी दिला आहे. यापूर्वीही महापालिकेत टिपू सुलतान याच्या फोटोवरून वाद निर्माण झाला होता. आता नमाज पठणाच्या घटनेमुळे मालेगावातील राजकीय आणि सामाजिक वातावरण अधिक तणावपूर्ण बनले आहे. प्रशासनाकडून पुढील कारवाई काय होते, याकडे सर्वांचे लक्ष लागले आहे.