Manoj Jarange Patil | मुसळधार पाऊस असो किंवा कडक ऊन, मराठे मुंबईतच… मनोज जरांगे निर्णयावर ठाम

मराठा आरक्षणाच्या मागणीसाठी मनोज जरांगे पाटील यांनी पुन्हा एकदा आंदोलनाची हाक दिली असून, मराठा समाज मुंबईच्या दिशेने कूच करणार आहे. सरकार गोरगरीब मराठ्यांच्या प्रश्नाकडे लक्ष देत नसल्याचा आरोप जरांगे पाटील यांनी केला आहे. नियोजित वेळापत्रकानुसार, १५ सप्टेंबर रोजी अंतरवाली सराटी येथून पदयात्रा सुरू होईल. त्यानंतर पाटोदा (बीड), श्रीगोंदा (अहमदनगर), हडपसर (पुणे), खोपोली (रायगड) येथे मुक्काम करत, १९ सप्टेंबर रोजी सकाळी १० वाजता मुंबईतील आझाद मैदानावर शांततेत आमरण उपोषण सुरू करण्यात येणार आहे.

जरांगे पाटील यांनी स्पष्ट केले की, ही तयारी आता पूर्णत्वास आली आहे आणि मराठा समाज गावागावातून एकत्र येत आहे. अलीकडच्या पावसामुळे शेतकऱ्यांमध्ये आनंदाचे वातावरण आहे, ज्याचा आंदोलनाला मोठा सकारात्मक पाठिंबा मिळत आहे. ते म्हणाले, पाऊस असो वा कडक ऊन, मराठा समाज आरक्षणाच्या मागणीसाठी मुंबईत येणारच. सरकारच्या वेळकाढूपणा आणि आमच्या जवळच्या सहकाऱ्यांना त्रास देण्याच्या कृतींवर त्यांनी तीव्र नाराजी व्यक्त केली. लोकशाही मार्गाने शांततेत आंदोलन करण्याचा आपला शब्द पाळत मराठा समाज आरक्षणासाठी निर्णायक लढा देण्यास सज्ज असल्याचे जरांगे पाटील यांनी नमूद केले.