Sanjay Raut : गमबूट अन् चार तासांचा एक दौरा, आभाळ फाटलं अन् सरकार… राऊतांचा हल्लाबोल

शिवसेना (उद्धव बाळासाहेब ठाकरे गट) नेते संजय राऊत यांनी मराठवाड्यासह राज्यातील पूरग्रस्त भागातील परिस्थितीवरून महाराष्ट्र सरकारवर जोरदार टीका केली आहे. राऊत यांनी राज्य मंत्रिमंडळाला कामचुकार असे संबोधत, पूरग्रस्तांना आवश्यक मदत पुरवण्यात सरकार अपयशी ठरल्याचे म्हटले आहे. लोकांपर्यंत अन्न, पाणी पोहोचलेले नाही, घरे वाहून गेली आहेत आणि निवारा नाही, अशी गंभीर स्थिती असतानाही सरकार मदत करण्याऐवजी क्रिकेट सामने, मुंबई क्रिकेट असोसिएशनच्या निवडणुका आणि इंडियन प्रीमियर लीग (आयपीएल) च्या बंदोबस्तात व्यस्त असल्याचे त्यांनी नमूद केले.

खाजगी संस्था, सामाजिक आणि राजकीय कार्यकर्त्यांनी जेवढी मदत केली आहे, तेवढीही मदत सरकारकडून मिळालेली नाही, असा दावा राऊत यांनी केला. उद्धव ठाकरे यांच्या शिवसेनेचे कार्यकर्ते मदत करत असले तरी त्यांना मर्यादा आहेत. अशावेळी सरकारकडूनच पूर्ण मदतीची अपेक्षा असते, असे राऊत यांनी स्पष्ट केले. त्यांनी पूरग्रस्त जिल्ह्यांना ओला दुष्काळ जाहीर करण्याची मागणी केली, तसेच पालकमंत्री आणि मुख्यमंत्र्यांच्या अनुपस्थितीवरही प्रश्नचिन्ह उपस्थित केले.