सत्याचा मोर्चासाठी अविनाश जाधव, अभिजीत पानसे यांचाही लोकल प्रवास

निवडणूक आयोगाच्या कथित भोंगळ कारभाराच्या विरोधात विरोधात मनसे आणि मविआने मुंबईत सत्याचा मोर्चा आयोजित केला आहे. मनसे नेते अविनाश जाधव आणि अभिजित पानसे हे अनेक कार्यकर्त्यांसह ठाण्यातून लोकल ट्रेनने मुंबई सीएसटीकडे रवाना झाले आहेत. या मोर्चाचा मुख्य उद्देश मतदार याद्यांमधील घोळ, दुबार नावे आणि बोगस मतदारांची समस्या निवडणूक आयोगाच्या निदर्शनास आणून देणे हा आहे. मोर्चेकऱ्यांनी असा दावा केला आहे की, ठाणे लोकसभा मतदारसंघातही दोन लाखांहून अधिक दुबार आणि बोगस मते आहेत.

या मोर्च्यामागे केवळ निवडणुकीचा विचार नसून, मतदार याद्यांची स्वच्छता आणि पारदर्शकता हा मुख्य उद्देश आहे, असे मोर्चेकऱ्यांनी स्पष्ट केले. ठाणे लोकसभा मतदारसंघातच दोन लाखांहून अधिक दुबार आणि बोगस मते असल्याची गंभीर बाब त्यांनी निदर्शनास आणली. मोर्चेकऱ्यांनी भारतीय जनता पक्षावरही टीका केली, की निवडणूक आयोगाला प्रश्न विचारला असता, भाजप नेते उत्तरे देत आहेत. याचा अर्थ निवडणूक आयोग भाजपच्याच एका शाखेप्रमाणे काम करत असल्याचा त्यांचा आरोप आहे. यामुळे हा मोर्चा भाजपच्या जिव्हारी लागल्याचेही ते म्हणाले.