Raj Thackeray : थेट दुबार मतदार दाखवले, राज ठाकरेंनी दाखवला ठसठशीत पुरावा

महाराष्ट्र नवनिर्माण सेनेचे अध्यक्ष राज ठाकरे यांनी राज्यातील मतदार यादीतील गंभीर अनियमिततांवर प्रकाश टाकला आहे. ठाणे लोकसभा मतदारसंघात २,०९,९८९ दुबार मतदार असल्याचा थेट पुरावा त्यांनी सादर केला. या गोंधळामुळे महाराष्ट्रातील निवडणूक प्रक्रियेवर प्रश्नचिन्ह निर्माण झाले आहे. राज ठाकरेंनी निवडणूक आयोगाला आव्हान देत, कोर्टाच्या आदेशाचा हवाला देऊन जानेवारीत निवडणुका घेण्याच्या घाईवर नाराजी व्यक्त केली. पाच वर्षांपासून निवडणुका न झाल्याने आता घाई कशासाठी, असा सवाल त्यांनी उपस्थित केला. एका आमदाराच्या भावाने २०,००० मते बाहेरून आणल्याचा दावा करणे, मुलीचे वय ११४ तर वडिलांचे वय ४३ असणे, तसेच नवी मुंबई आयुक्तांच्या बंगल्यावर किंवा सुलभ शौचालयात मतदार नोंदणी होणे, हे अत्यंत लाजिरवाणे असल्याचे ठाकरे म्हणाले. मतदारांनी रांगेत उभे राहून मतदान करायचे, पण मॅच फिक्स असेल तर मतदाराच्या मताचा अपमान आहे, असे राज ठाकरे म्हणाले.