Viral Video | मुंबईत पावसाचा कहर! बिग बी अमिताभ बच्चन यांच्या जनक बंगल्याबाहेर पाणीच पाणी

मुंबईसह उपनगरांमध्ये सुरू असलेल्या मुसळधार पावसामुळे जनजीवन पूर्णपणे विस्कळीत झाले असून, अनेक भागांमध्ये पाणी साचल्याने नागरिकांना मोठ्या अडचणींचा सामना करावा लागत आहे. हवामान विभागाने दिलेल्या इशाऱ्यानंतर प्रशासनाने अनेक ठिकाणच्या शाळांना सुट्टी जाहीर केली असून, अत्यावश्यक कामाशिवाय घराबाहेर पडू नये, असे आवाहनही नागरिकांना करण्यात आले आहे.

सततच्या पावसामुळे शहरातील अनेक प्रमुख रस्ते जलमय झाले असून, ठिकठिकाणी वाहतूक कोंडी निर्माण झाली आहे. अनेक वाहने पाण्यात अडकली असून, काही ठिकाणी गाड्या बंद पडल्याचीही माहिती समोर आली आहे. रस्त्यांवर मोठ्या प्रमाणात पाणी साचल्याने नागरिकांना पाण्यातून मार्ग काढत प्रवास करावा लागत असून, मुंबईतील अनेक भागांमध्ये जनजीवनावर मोठा परिणाम झाला आहे.

दरम्यान, या मुसळधार पावसाचा फटका बॉलिवूडचे महानायक अमिताभ बच्चन यांनाही बसला आहे. मुंबईतील त्यांच्या ‘जनक’ बंगल्याच्या परिसरात मोठ्या प्रमाणात पाणी साचल्याचे समोर आले आहे. सततच्या पावसामुळे संपूर्ण परिसर जलमय झाला असून, त्याचे व्हिडिओ आणि छायाचित्रे सोशल मीडियावर मोठ्या प्रमाणात व्हायरल होत आहेत.

मुंबईत पुढील काही तासांतही मुसळधार पावसाचा अंदाज व्यक्त करण्यात आला असून, प्रशासनाने नागरिकांना सतर्क राहण्याचे, पाणी साचलेल्या रस्त्यांवरून प्रवास टाळण्याचे आणि हवामान विभागाच्या सूचनांचे पालन करण्याचे आवाहन केले आहे.