मुंबई–पुणे प्रवास 30 मिनिटांनी कमी होणार; मुख्यमंत्री फडणवीस- शिंदेंच्या हस्ते मिसिंग लिंकचं लोकार्पण

मुंबई–पुणे द्रुतगती मार्गावरील ‘मिसिंग लिंक’ प्रकल्पाचे महाराष्ट्र दिनाच्या निमित्ताने लोकार्पण करण्यात आले असून, हा महत्त्वाकांक्षी प्रकल्प आता पूर्ण क्षमतेने वाहतुकीसाठी खुला झाला आहे. या प्रकल्पामुळे प्रवास अधिक वेगवान, सुरक्षित आणि सोयीस्कर होणार असल्याचे प्रशासनाकडून सांगण्यात आले आहे. या ‘मिसिंग लिंक’मुळे द्रुतगती मार्गावरील पूर्वीच्या त्रुटी दूर होणार असून, वाहनांचा वेग वाढण्यास मदत होईल. तसेच प्रवासाचा वेळ कमी होऊन इंधनाचीही बचत होणार आहे. परिणामी, मुंबई आणि पुणे दरम्यानचा प्रवास अधिक सुलभ आणि निसर्गरम्य होणार असल्याचे चित्र आहे.
या प्रकल्पाचे उद्घाटन मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या हस्ते पार पडले. उद्घाटनानंतर मुख्यमंत्री फडणवीस यांनी स्वतः वाहन चालवत या मार्गाचा आढावा घेतला. त्यांनी खोपोली बोगद्यापासून प्रवासाला सुरुवात करत ‘मिसिंग लिंक’च्या विविध टप्प्यांची पाहणी केली. 2018 साली सुरू झालेला हा प्रकल्प अनेक तांत्रिक अडचणींवर मात करत अखेर पूर्णत्वास आला आहे. राज्याच्या पायाभूत सुविधांच्या विकासात हा एक महत्त्वाचा टप्पा मानला जात असून, देशाच्या दृष्टीनेही हा प्रकल्प अत्यंत महत्त्वाचा असल्याचे मानले जात आहे.
एकूणच, ‘मिसिंग लिंक’ प्रकल्पामुळे मुंबई–पुणे प्रवासात मोठी सुधारणा होणार असून, वाहतूक कोंडी कमी होण्यासोबतच आर्थिक आणि औद्योगिक प्रगतीलाही चालना मिळण्याची अपेक्षा व्यक्त केली जात आहे.