ऑक्टोबर हीटने मुंबईकर हैराण! मान्सून पुन्हा सक्रिय होण्याची शक्यता

महाराष्ट्रातून मान्सून माघारी गेल्यानंतर मुंबईमध्ये ऑक्टोबर हीटचा अनुभव येत आहे. काल मुंबईत 33.6 अंश सेल्सिअस तापमानाची नोंद झाली असून, येत्या काळात तापमान आणखी वाढण्याची शक्यता हवामान विभागाने वर्तवली आहे. 16 आणि 17 ऑक्टोबर रोजी मान्सून पुन्हा सक्रिय होण्याची शक्यता असली तरी, गेल्या काही दिवसांपासूनच्या गैरहजेरीमुळे तापमानात वाढ झाली आहे.

ऐतिहासिकदृष्ट्या ऑक्टोबरमधील तापमान सुमारे 33.6 अंश सेल्सिअस असायचे. मात्र, गेल्या काही वर्षांपासून वातावरणीय बदलांमुळे ते 36 अंश सेल्सिअसपर्यंत पोहोचताना दिसत आहे. यामुळे वेळीच उपाययोजना करण्याची गरज व्यक्त होत आहे. तापमानातील वाढीसोबतच मुंबईतील हवेचा गुणवत्ता स्तरही खालावत आहे. देवनार येथे 209 AQI ची नोंद झाली असून, चेंबूर, मालाड आणि बोरीवलीमध्येही स्थिती चिंताजनक आहे. 21 आणि 22 ऑक्टोबर रोजी दिवाळीनिमित्त फटाके फोडल्यामुळे AQI आणखी वाढण्याची शक्यता आहे. मुंबईकर नागरिक ऑक्टोबर हीट आणि खालावलेल्या हवेच्या गुणवत्तेचा सामना करत असल्याने महानगरपालिकेच्या उपाययोजनांकडे लक्ष लागले आहे.