Nanded : दिवाळी गेली तरीही मदत नाही… संतप्त शेतकऱ्यानं तहसीलदाराच्या कारचा केला चुराडा

नांदेड जिल्ह्यातील मुदखेड येथे आनंद देऊळगावकर या तहसीलदारांच्या गाडीची एका शेतकऱ्याने तोडफोड केली आहे. साईनाथ खानसोळे नामक शेतकऱ्याने जय जवान जय किसान म्हणत फावड्याच्या साहाय्याने गाडीच्या काचा फोडल्या. अनुदानाचे पैसे मिळाले नसल्याने दिवाळी साजरी झाली नाही, असा आरोप या शेतकऱ्याने केला आहे.

तसेच, कोणताही अधिकारी शेतकऱ्यांच्या बांधावर येत नसल्याचेही त्याने म्हटले आहे. या घटनेनंतर तहसीलदार आनंद देऊळगावकर यांनी स्पष्टीकरण दिले आहे. त्यांच्या माहितीनुसार, साईनाथ खानसोळे यांना दिवाळीपूर्वीच 6,290 रुपये अनुदान जमा झाले होते. त्यांच्याकडे गट क्रमांक 371 आणि 382 मध्ये जमीन असून, वैयक्तिक जमीन एक हेक्टरपेक्षा कमी आहे.

मुदखेड तालुक्यात सुमारे 85 टक्के शेतकऱ्यांना अनुदानाचे पैसे मिळाले आहेत, असेही तहसीलदारांनी नमूद केले. या प्रकरणी शेतकऱ्याला ताब्यात घेण्यात आले असून, पुढील तपास सुरू आहे. तहसीलदारांनी शेतकऱ्यांना आक्रमक न होता प्रशासनासोबत संवाद साधण्याचे आवाहन केले आहे.