Ajit Pawar NCP : दादांच्या राष्ट्रवादीतील महिला पदाधिकारी लावणीवर थिरकली, बेफाम नृत्य अन् अदाकारीचा Video तुफान व्हायरल

राष्ट्रवादी अजितदादा गटाच्या शहरातील कार्यालयात आयोजित करण्यात आलेल्या एका कार्यक्रमातील लावणी नृत्याचा व्हिडिओ सध्या समाज माध्यमांवर मोठ्या प्रमाणात व्हायरल होत आहे. या व्हिडिओमुळे अनेक प्रश्नचिन्हे उपस्थित झाली असून, कार्यक्रमाच्या आयोजकांवर जोरदार टीका केली जात आहे. मिळालेल्या माहितीनुसार, दोन महिन्यांपूर्वी अजित पवार यांच्या हस्ते या कार्यालयाचे उद्घाटन झाले होते. त्यानंतर दिवाळी मिलन कार्यक्रमाचे आयोजन करण्यात आले होते. याच कार्यक्रमादरम्यान एका महिला पदाधिकाऱ्याने लावणीवर नृत्य केले. हे नृत्य राष्ट्रवादी अजितदादा गटाच्या शहर कार्यालयात, शहराध्यक्ष आणि इतर प्रमुख पदाधिकाऱ्यांच्या उपस्थितीत सादर करण्यात आले.

पक्ष कार्यालयात अशा प्रकारच्या लावणी नृत्याचे सादरीकरण कितपत योग्य आहे, हा मुख्य प्रश्न या घटनेमुळे निर्माण झाला आहे. हा व्हिडिओ व्हायरल झाल्यापासून समाज माध्यमांवर शहराध्यक्ष यांच्यावर टीका केली जात आहे. त्यांनी अशा कार्यक्रमाचे आयोजन कसे केले आणि त्यांच्या उपस्थितीत हे नृत्य कसे सादर झाले, यावर जोरदार चर्चा सुरू आहे. या घटनेमुळे राजकीय वर्तुळातही एकच खळबळ उडाली आहे.