Navi Mumbai | बिकानेरच्या रसमलाईत चक्क बुरशी! कामोठ्यात धक्कादायक प्रकार समोर; दुकान मालकाने चूक मान्य करत…

कामोठे येथील बिकानेर मिठाईच्या दुकानात बुरशी लागलेल्या रसमलाईची विक्री झाल्याचा एक धक्कादायक प्रकार समोर आला आहे. या घटनेमुळे अन्नसुरक्षेबाबत गंभीर प्रश्नचिन्ह निर्माण झाले असून, नवी मुंबईतील नागरिकांकडून याबाबत तीव्र नाराजी व्यक्त होत आहे.

मिळालेल्या माहितीनुसार, कामोठे येथील प्रसिद्ध बिकानेर दुकानात ग्राहकांना बुरशीयुक्त रसमलाई विकण्यात आली. हा प्रकार उघडकीस आल्यानंतर दुकान मालकाने आपली चूक मान्य केली असून, त्यांनी याबाबत सार्वजनिक माफी देखील मागितली आहे. मात्र, केवळ माफी मागून हे प्रकरण थांबणार नाही, अशी ग्राहकांची भूमिका आहे.

या गंभीर प्रकरणाची अन्न व औषध प्रशासनाने (FDA) तात्काळ दखल घ्यावी, अशी मागणी जोर धरत आहे. एफडीएने या दुकानाची कसून तपासणी करावी आणि अन्नसुरक्षा नियमांचे उल्लंघन झाल्याचे आढळल्यास संबंधित दुकानावर कठोर कारवाई करावी, अशी मागणी नागरिकांकडून करण्यात येत आहे. अशा घटनांमुळे मिठाई विक्रेत्यांनी आपल्या उत्पादनांची गुणवत्ता आणि स्वच्छतेबाबत अधिक सजग राहण्याची गरज अधोरेखित झाली आहे. ग्राहकांच्या आरोग्याशी कोणताही खेळ खपवून घेतला जाणार नाही, असा इशाराही दिला जात आहे.