Supriya Sule : …तर बीडमध्ये उपोषण करणार, मुंडेंच्या दिल्ली भेटीनंतर राजकारण तापलं, सुप्रिया सुळे यांचं इशारा

धनंजय मुंडे यांनी नुकतीच दिल्लीत केंद्रीय गृहमंत्री अमित शहा यांची भेट घेतल्याने महाराष्ट्राच्या राजकारणात चर्चांना उधाण आले आहे. ही भेट मुंडेंच्या मंत्रिमंडळात पुन्हा प्रवेशासाठीची फिल्डिंग असल्याचे बोलले जात आहे. मात्र, या संभाव्य पुनरागमनाला राष्ट्रवादी काँग्रेसच्या नेत्या सुप्रिया सुळेंनी तीव्र विरोध दर्शवला आहे. सुप्रिया सुळे यांनी स्पष्ट केले आहे की, जर धनंजय मुंडे यांना पुन्हा मंत्रीपद दिले, तर त्या बीडमध्ये उपोषण करतील. संतोष देशमुख हत्या प्रकरणात धनंजय मुंडे यांचा राजीनामा घेण्यात आला होता. आरोपांमध्ये तथ्य असल्याशिवाय सरकारने राजीनामा घेतला नसता, असे सुप्रिया सुळेंनी म्हटले आहे. या भेटीचे टायमिंग विशेष आहे, कारण मंत्री माणिकराव कोकाटे यांना न्यायालयाने शिक्षा सुनावल्यानंतर त्यांच्या खात्यांचा प्रश्न निर्माण झाला होता. संजय राऊत यांनीही फडणवीस सरकार मुंडेंना मंत्रीपदावर परत आणण्याचे पाप करणार नाही, असे मत व्यक्त केले. भाजपने मात्र धनंजय मुंडे यांच्या मंत्रिमंडळ प्रवेशाबाबत सध्या कोणतीही चर्चा नसल्याचे आणि अमित शहांची भेट पूर्वनियोजित असल्याचे स्पष्ट केले आहे.