राष्ट्रवादीत मोठा उलटफेर! रोहित पवारांनी सांगितलं 15 दिवसांतच पक्ष घेणार हा निर्णय, विधानाची जोरदार चर्चा

राष्ट्रवादी काँग्रेस शरद पवार गटात पुढील 15 दिवसांत मोठे फेरबदल होणार असल्याची माहिती आमदार रोहित पवार यांनी दिली आहे. पक्षाच्या वर्धापन दिन कार्यक्रमात बोलताना त्यांनी संघटनेत नव्या चेहऱ्यांना संधी दिली जाणार असल्याचे स्पष्ट केले. विशेष म्हणजे राजकारणाशी थेट संबंध नसलेल्या तरुण आणि विविध क्षेत्रातील व्यक्तींनाही पक्षात महत्त्वाची जबाबदारी दिली जाणार असल्याचे त्यांनी सांगितले.

रोहित पवार म्हणाले की, पक्ष अधिक मजबूत करण्यासाठी संघटनात्मक बदल आवश्यक आहेत. ग्रामीण भागातील कार्यकर्ते, युवक आणि महिलांना पुढे आणण्यावर भर दिला जाणार आहे. तसेच आगामी स्थानिक स्वराज्य संस्था निवडणुकांच्या पार्श्वभूमीवर पक्ष नव्या रणनीतीने काम करणार असल्याचेही त्यांनी नमूद केले.

यावेळी त्यांनी सत्ताधारी पक्षावर जोरदार टीकाही केली. राज्यातील अनेक प्रश्न प्रलंबित असून जनतेच्या समस्या सोडवण्यात सरकार अपयशी ठरत असल्याचा आरोप त्यांनी केला. शेतकरी, बेरोजगारी आणि महागाईच्या मुद्द्यावरूनही त्यांनी सरकारला लक्ष्य केले.