Nitesh Karale : भाजपमध्ये पक्षप्रवेशाची ऑफर आली तर… कराळे मास्तरांनी थेट सांगून टाकलं, उत्तराची एकच चर्चा

शिक्षक नेते नितेश कराळे यांनी भारतीय जनता पार्टीकडून (भाजप) भविष्यात कोणत्याही प्रकारची ऑफर स्वीकारणार नसल्याचे ठामपणे सांगितले आहे. मुख्यमंत्री पद दिले तरी भाजपमध्ये जाणार नाही, अशी भूमिका त्यांनी मांडली. आपण शिव, फुले, शाहू, आंबेडकर विचारधारेचे आहोत आणि भाजपचे विचार पटत नसल्यामुळे त्यांच्या पक्षात जाणे शक्य नसल्याचे कराळे म्हणाले. याचबरोबर, राष्ट्रवादी काँग्रेसचे अध्यक्ष शरद पवार यांच्याबद्दल आदर असला तरी, त्यांच्या पक्षात परत जाणार नसल्याचेही कराळे यांनी स्पष्ट केले.

पवार साहेबांकडून राजकारण शिकायला मिळाल्याचे ते मान्य करतात, पण आता स्वतःचे वेगळे अस्तित्व निर्माण करत असल्याचे त्यांनी सांगितले. आगामी काळात जिल्हा परिषद आणि विधानसभा निवडणुकीसाठी आपल्यासारख्या युवकांची संघटना उभारणार असल्याचे सूतोवाचही त्यांनी केले. ही संघटना विद्यार्थ्यांसाठी आणि युवकांच्या कामासाठी काम करेल.