Prithviraj Chavan : मोठा संघर्ष अटळ, एकूण 300 GB डेटा अन् 95 हजार फोटोग्राफ्स… Epstein files वरून पृथ्वीराज चव्हाण यांचा खळबळजनक दावा

माजी मुख्यमंत्री पृथ्वीराज चव्हाण यांनी अमेरिकेतील जेफ्री एपस्टीन बाल लैंगिक शोषण प्रकरणावर महत्त्वपूर्ण भाष्य केले आहे. कराड येथील पत्रकार परिषदेत त्यांनी सांगितले की, अमेरिकेत १९९५-९६ पासून एक मोठा बाल लैंगिक शोषण घोटाळा सुरू आहे, ज्याची माहिती हळूहळू समोर येत आहे. या प्रकरणाचा मुख्य सूत्रधार धनाढ्य उद्योगपती जेफ्री एपस्टीन याचा ऑगस्ट २०१९ मध्ये न्यूयॉर्कमधील उच्च सुरक्षा कारागृहात संशयास्पदरित्या मृत्यू झाला होता. त्याने आत्महत्या केली की त्याची हत्या झाली, हे अजूनही स्पष्ट झालेले नाही.

एपस्टीनने अनेक अल्पवयीन मुलींचे लैंगिक शोषण केले आणि उच्चपदस्थ व्यक्तींसाठी त्यांचा देहविक्रय केल्याचा आरोप आहे. हे प्रकरण इतके तापले आहे की, अमेरिकेच्या दोन्ही प्रमुख राजकीय पक्षांच्या खासदारांना ते दडपणे अशक्य झाले आहे. जनतेच्या प्रचंड दबावामुळे अमेरिकेला या प्रकरणातील सर्व माहिती प्रकाशित करावी लागली आहे. जनतेच्या दबावामुळेच तत्कालीन राष्ट्राध्यक्ष डोनाल्ड ट्रम्प यांनाही तीन दिवसांच्या आत ही सर्व माहिती समोर आणण्याचा निर्णय घ्यावा लागला, असे चव्हाण यांनी नमूद केले. गेल्या ३० वर्षांचा हा डेटा असून, या प्रकरणात प्रचंड मोठा पुरावा उपलब्ध आहे. अमेरिकेत एपस्टीन फाईल्सवरुन मोठा संघर्ष होणार असल्याचे चव्हाण यांनी सांगितले.