Parth Pawar Land Scam : पुण्यातील मुंढवा जमीन व्यवहारप्रकरणी पार्थ पवारांना ‘क्लीन चिट’

पुण्यातील मुंढवा जमीन व्यवहारप्रकरणी पार्थ पवारांना क्लीन चिट मिळाली आहे. महसूल विभागाच्या खारगे समितीने सादर केलेल्या अहवालात त्यांना निर्दोष घोषित करण्यात आले आहे. या प्रकरणातील कागदपत्रांवर पार्थ पवार यांचे नाव किंवा स्वाक्षरी आढळून आलेली नाही, हे क्लीन चिट मिळण्याचे मुख्य कारण आहे.

या जमीन गैरव्यवहार प्रकरणी पोलिसांनी दाखल केलेल्या आरोपपत्रातही पार्थ पवार यांचा उल्लेख नव्हता. तसेच, राज्य सरकारने नियुक्त केलेल्या खारगे समितीच्या अहवालातही त्यांचे नाव नसल्याचे समोर आले आहे. यामुळे, पार्थ पवार यांची या प्रकरणात कोणतीही भूमिका नसल्याचे स्पष्ट झाले आहे.

दुसरीकडे, या प्रकरणात अमिडीया कंपनीला २१ कोटी रुपयांचे मुद्रांक शुल्क भरावे लागणार आहे. महार वतणाची ही जागा एका खासगी कंपनीने विकत घेतली होती. हा व्यवहार रद्द करण्यासाठी अर्ज आले असले तरी, मुद्रांक शुल्क भरल्याशिवाय तो रद्द होऊ शकत नाही. या जमीन गैरव्यवहारात दिग्विजय पाटील आणि शीतल तेजवानी यांच्यावर ठपका ठेवण्यात आला आहे.