Pune : तो पत्नीला नगरसेवक बनवणार होता, पण तिनं त्याचाच केला घात, संशय अन् राग…पत्नीनं नवऱ्यालाच असं संपवलं

पिंपरी-चिंचवडमधून एक धक्कादायक घटना समोर आली आहे, जिथे राजकीय महत्वकांक्षा आणि चारित्र्याच्या संशयामुळे एका पत्नीने आपल्या पतीची हत्या केली. नकुल भोईर (वय ४०) हे समाजकार्यात सक्रिय होते आणि त्यांची पत्नी चैताली भोईर (वय २८) यांना नगरसेवक बनवण्याचे स्वप्न पाहत होते. नकुल भोईर संभाजी ब्रिगेडचे पदाधिकारी आणि शहीद भगतसिंग परिषदेचे संस्थापक अध्यक्ष होते, त्यांचा जनसंपर्क दांडगा होता.

मिळालेल्या माहितीनुसार, नकुल आपल्या पत्नी चैतालीवर वारंवार संशय घेत असे, ज्यामुळे त्यांच्यात सतत भांडणे होत होती. चैताली महत्त्वाकांक्षी होती आणि तिला राजकारणात प्रवेश करायचा होता. काल मध्यरात्री दोनच्या सुमारास त्यांच्यात पुन्हा एकदा चारित्र्याच्या संशयावरून वाद झाला. या वादाचे रूपांतर हाणामारीत होऊन, रागाच्या भरात चैतालीने पती नकुलच्या गळ्याभोवती ओढणीचा फास आवळून त्याची हत्या केली. ही घटना घडली तेव्हा त्यांची दोन आणि पाच वर्षांची मुले आतल्या खोलीत झोपलेली होती. पोलिसांनी चैताली भोईरला अटक केली असून, कौटुंबिक रागातूनच हे कृत्य घडल्याचे प्राथमिक तपासात समोर आले आहे.