Phaltan Doctor Death : डॉक्टर महिलेची आत्महत्या नाही तर… राहुल गांधींचा गंभीर आरोप काय? भाजपवरही घणाघात

फलटणमधील एका महिला डॉक्टरच्या मृत्यू प्रकरणावर काँग्रेस नेते राहुल गांधी यांनी तीव्र प्रतिक्रिया दिली आहे. या घटनेला आत्महत्या नसून संस्थात्मक हत्या असल्याचे राहुल गांधींनी म्हटले आहे. त्यांनी आपल्या ट्वीटमध्ये या घटनेमुळे सुसंस्कृत समाजाच्या विवेकाला धक्का बसल्याचे नमूद केले आहे. राहुल गांधींच्या मते, इतरांचे दुःख कमी करण्याची आकांक्षा बाळगणारी एक होतकरू डॉक्टर भ्रष्ट व्यवस्थेतील गुन्हेगारांच्या छळाला बळी पडली. ज्यांच्यावर जनतेचे रक्षण करण्याची जबाबदारी होती, त्यांनीच हा घृणास्पद गुन्हा केला असल्याचा गंभीर आरोप त्यांनी केला आहे.

वृत्तानुसार, भाजपशी संबंधित काही प्रभावशाली लोकांनी संबंधित महिला डॉक्टरवर भ्रष्टाचार करण्यासाठी दबाव आणण्याचा प्रयत्न केला होता. याला संरक्षित गुन्हेगारी विचारसरणीचे सर्वात घृणास्पद उदाहरण संबोधत, राहुल गांधी यांनी म्हटले आहे की, जेव्हा सत्ता गुन्हेगारांना संरक्षण देते, तेव्हा न्यायाची अपेक्षा कशी करता येईल? डॉक्टरच्या मृत्यूने भाजप सरकारचा अमानवी आणि निर्दयी स्वभाव उघडकीस आणला असल्याचा दावा त्यांनी केला. काँग्रेस पक्ष पीडित कुटुंबासोबत न्यायाच्या लढाईत खंबीरपणे उभा असल्याचे राहुल गांधींनी स्पष्ट केले आहे, तसेच भारताच्या प्रत्येक मुलीसाठी आता भीती नाही, आम्हाला न्याय हवा आहे, अशी मागणीही त्यांनी केली.