तंबूत राहणाऱ्या रामलल्लाला पक्कं घर मिळालं, 4 कोटी गरीबांनाही पक्कं घर मिळालं, मोदींनी विकासाचं मॉडेल मांडलं

अयोध्या | 30 डिसेंबर 2023 : अयोध्येतील प्रभू राम चंद्राला तंबूत रहावे लागले, आता त्यांना पक्के घरं मिळाले आहे. देशातील चार कोटी जनतेला पक्की घरे मिळाली आहेत. अयोध्येच्या पायाभूत विकासासाठी 1500 कोटीहून अधिक रुपयांच्या योजना जाहीर करण्यात आल्याने अयोध्येचा विकास उत्तर प्रदेशला दिशा दाखवेल अशी घोषणा पंतप्रधान नरेंद्र मोदी यांनी आज येथे केली. देशात वंदेभारत बरोबरच आता सर्वसामान्यासाठी अमृतभारत ट्रेनही सुरु करण्यात आली आहे. त्यामुळे गरीबांनाही आरामदायी प्रवास करता येणार आहे. तरूणांना वंदेभारत ट्रेन आवडत असून कमी वेळात वंदेभारतमधून दीड कोटीहून अधिक प्रवाशांनी प्रवास केला आहे. अयोध्येत येणाऱ्या भाविकांना आता सोयी सुविधा मिळणार आहेत. विकास आणि वारसा या दोन्हींची जोड भारताला 21 व्या शतकात जगात सर्वात पुढे घेऊन जाईल असे पंतप्रधान नरेंद्र मोदी यांनी म्हटले आहे.