रोहित पवार काँग्रेस वाटेवर? परिणय फुकेंच्या दाव्याचे राजकीय पडसाद

भाजप आमदार परिणय फुके यांनी राष्ट्रवादी काँग्रेसचे नेते रोहित पवार काँग्रेसमध्ये प्रवेश करणार असल्याचा दावा केला आहे. रोहित पवार आणि काँग्रेसचे नेते नाना पटोले यांची भंडाऱ्यामध्ये गुप्त भेट झाल्याचेही फुकेंनी म्हटले आहे. तसेच, रोहित पवार यांचे राष्ट्रवादीतील सुप्रिया सुळे यांच्यासोबत मतभेद असून, त्यामुळेच ते काँग्रेसकडे वळत असल्याचा दावाही त्यांनी केला आहे. या आरोपांवर रोहित पवारांनी जोरदार प्रत्युत्तर दिले आहे. परिणय फुके यांनी माझ्या वैयक्तिक आयुष्याची काळजी करण्याऐवजी भ्रष्टाचारावर लक्ष केंद्रित करावे, असे पवार म्हणाले.

ते म्हणाले की, “तुम्ही देवेंद्र फडणवीस यांच्या जवळचे आहात, पण ती जवळीक तुम्ही कशासाठी वापरता? विरोधकांवर खोटी कारवाई करण्यासाठी किंवा आपल्या पदाधिकाऱ्यांचे वाळूचे धंदे सुरळीत चालवण्यासाठी.” फुकेंनी केलेले आरोप म्हणजे कॉमेडी असून, त्यांना नेटफ्लिक्ससाठी लेखक म्हणून काम मिळू शकेल, असा टोलाही पवारांनी लगावला. राजकारण गंभीर काम असून, विनोद करण्यासाठी नाही, असे पवार यांनी ठामपणे नमूद केले.