नायडूंना पदावर राहण्याचा अधिकार नाही! रोहित पवारांची टीका

महाराष्ट्राचे नेते अजित दादा यांच्या अपघाती निधनानंतर त्यांच्या चौकशी आणि न्यायाच्या मागणीसाठी जनतेतून आवाज उठत आहे. या पार्श्वभूमीवर, आमदार रोहित पवार यांनी केंद्रीय हवाई वाहतूक मंत्री राममोहन नायडू यांच्या राजीनाम्याची मागणी केली आहे. डीजीसीए (Directorate General of Civil Aviation) ने व्हीएसआर व्हेंचर्सला दिलेले सुरुवातीचे क्लीन चिट आणि त्यानंतरच्या विशेष सुरक्षा ऑडिटमधील निष्कर्षांमध्ये मोठी विसंगती असल्याचे पवारांनी म्हटले आहे.

रोहित पवार यांनी सांगितले की, 28 जानेवारी 2026 रोजी, अपघातानंतर लगेचच डीजीसीएने एक अहवाल जारी केला होता. या अहवालात व्हीएसआर व्हेंचर्सच्या लियरजेट विमानामध्ये कोणतीही लेव्हल 1 त्रुटी आढळली नसल्याचे नमूद करण्यात आले होते. त्याच दिवशी केंद्रीय हवाई वाहतूक मंत्र्यांनीही व्हीएसआर व्हेंचर्समध्ये सुरक्षाविषयक कोणतीही चिंता नसल्याचे म्हटले होते.

मात्र, अलीकडेच झालेल्या व्हीएसआर व्हेंचर्सच्या विशेष सुरक्षा ऑडिटमध्ये अनेक त्रुटी (non-compliances) आढळून आल्या आहेत. यामध्ये विमान उडण्यायोग्य आहे की नाही (Airworthiness), हवाई सुरक्षा (Air Safety) आणि उड्डाण कार्यान्वित करण्याच्या प्रक्रियेतील (Flight Operations) त्रुटींचा समावेश आहे. जनतेच्या दबावामुळेच हा तपास योग्य दिशेने जात असल्याचे रोहित पवार यांनी नमूद केले. या गंभीर विसंगतीमुळे, त्यांनी केंद्रीय मंत्र्यांच्या राजीनाम्याची मागणी केली आहे, जोपर्यंत न्याय मिळत नाही तोपर्यंत हा लढा सुरूच राहील असे त्यांनी स्पष्ट केले.