Sangli Bank Election Result : सांगली जिल्हा बँकेच्या 6 जागांसाठी आज निकाल; कोण मारणार बाजी?

सांगली जिल्हा मध्यवर्ती बँकेच्या 6 जागांसाठी झालेल्या निवडणुकीचा आज निकाल लागणार आहे. मिरजमधील बाजार समितीच्या शेतकरी भवनात मतमोजणीला सुरुवात झाली असून, संपूर्ण सांगली जिल्ह्याचे लक्ष या निकालाकडे लागले आहे.

या निवडणुकीत अनेक राजकीय दिग्गजांची प्रतिष्ठा पणाला लागली आहे. यामध्ये आमदार गोपीचंद पडळकर, माजी खासदार संजय काका पाटील, माजी आमदार सुमनताई पाटील आणि माजी मंत्री अजितराव घोरपडे यांचा समावेश आहे. या प्रमुख लढतीमुळे ही निवडणूक अत्यंत चुरशीची ठरली आहे.

कायदा व सुव्यवस्था राखण्यासाठी मतमोजणी केंद्रावर चोख पोलीस बंदोबस्त ठेवण्यात आला आहे. कोणताही अनुचित प्रकार घडू नये यासाठी प्रशासनाने योग्य ती खबरदारी घेतली आहे. थोड्याच वेळात निवडणुकीचे चित्र स्पष्ट होणार असून, या 6 जागांवर कोण बाजी मारणार हे समोर येईल.