Sanjay Raut : SIT चं खेळणं आम्हाला काय दाखवताय…; मनोज जरांगे प्रकरणावरून संजय राऊतांचा सरकारवर हल्लाबोल

शिवसेना (उद्धव बाळासाहेब ठाकरे) नेते संजय राऊत यांनी मराठा आंदोलनाशी संबंधित ५०० कोटी रुपयांच्या कथित व्यवहारावरून सत्ताधाऱ्यांवर गंभीर प्रश्न उपस्थित केले आहेत. मनोज जरांगे पाटील यांनी सादर केलेल्या पुराव्यांच्या आधारे, हे ५०० कोटी रुपये आंदोलन थांबवण्यासाठी भाजपच्या माध्यमातून श्रीकांत शिंदे यांना देण्यात आल्याचा आरोप राऊत यांनी केला आहे.

राऊत यांनी आतापर्यंत या प्रकरणात गुन्हा का दाखल झाला नाही, असा सवाल उपस्थित करत सरकारची निष्क्रियता अधोरेखित केली. ते म्हणाले, “या एसआयटीचं खेळणं आम्हाला काय दाखवताय? ती धूळफेक बंद करा.” अनिल देशमुख प्रकरणात १०० कोटींच्या आरोपावरून तात्काळ कारवाई झाली, तर ५०० कोटींच्या पुराव्यासह असलेल्या आरोपावर कारवाई का नाही, असा त्यांचा सवाल होता. राऊत यांनी केंद्रीय गृहमंत्री अमित शहा आणि उपमुख्यमंत्री देवेंद्र फडणवीस यांना भ्रष्टाचाराविरोधातील भूमिकेची आठवण करून देत, तात्काळ चौकशीचे आदेश देण्याची मागणी केली आहे.