राज्यसभेवर कोण जाणार हे…; संजय राऊतांनी स्पष्टच सांगून टाकलं

महाराष्ट्रामध्ये रिक्त होणाऱ्या राज्यसभेच्या सात जागांसाठी राजकीय हालचालींना वेग आला आहे. महाविकास आघाडीच्यावतीने एकच उमेदवार दिला जाईल आणि काँग्रेस, राष्ट्रवादी काँग्रेस, तसेच शिवसेना (उद्धव बाळासाहेब ठाकरे) हे तीन पक्ष एकत्रित बसून अंतिम निर्णय घेतील, असे शिवसेना (उद्धव बाळासाहेब ठाकरे) नेते संजय राऊत यांनी स्पष्ट केले आहे.

सध्या देशभरातून ३६ जागा रिक्त होत असून, महाराष्ट्रातून सात जागा रिक्त होणार आहेत. यापैकी सहा जागा निवडून आणण्याचे बळ महायुतीकडे आहे. महाविकास आघाडीसमोर मात्र एका जागेसाठी समन्वय साधण्याचे आव्हान आहे. शरद पवार यांच्या उमेदवारीबाबत बोलताना, त्यांच्या निवडणूक लढवण्याच्या इच्छेवर तिन्ही पक्षांमध्ये चर्चा होईल आणि त्यानंतरच पुढील निर्णय घेतला जाईल, असे राऊत यांनी सांगितले. काँग्रेसच्या रजनी पाटील, राष्ट्रवादी काँग्रेसचे शरद पवार आणि फौजिया खान, तसेच शिवसेनेच्या प्रियंका चतुर्वेदी यांच्यासह प्रत्येक पक्षातून सदस्य निवृत्त होत आहेत.