साताऱ्यातील प्रसिद्ध बावधनच्या बगाड यात्रेला सुरुवात

सातारा जिल्ह्यातील वाई तालुक्यात आज प्रसिद्ध बावधन बगाड यात्रेला मोठ्या उत्साहात प्रारंभ झाला आहे. सकाळपासूनच भाविकांनी मोठ्या संख्येने सोणेश्वर मंदिराकडे धाव घेतली आहे, जिथे हे बगाड आणले जात आहे.

यावर्षी विठ्ठल कदम यांना बगाडा होण्याचा पवित्र मान मिळाला आहे. सुमारे सोळा वर्षांपूर्वी त्यांनी आपल्या भावाच्या प्रकृती स्वास्थ्यासाठी नवस बोलला होता. आज नवसपूर्तीच्या निमित्ताने त्यांना हा सन्मान मिळाला आहे. सोणेश्वर मंदिरापासून बावधन गावातील भैरोनाथाच्या मंदिरापर्यंत सुमारे चार किलोमीटर अंतरावर हे बगाड ओढले जाणार आहे. ही यात्रा सकाळपासून संध्याकाळपर्यंत चालते.

जिल्ह्यासह राज्यभरातील भाविक ही पारंपरिक बगाड यात्रा पाहण्यासाठी आवर्जून बावधन येथे दाखल होत आहेत. थोड्याच वेळात बगाड्या विठ्ठल कदम यांना बगाडाला लटकवून यात्रेतील मुख्य विधी सुरू होईल. ही यात्रा श्रद्धा आणि परंपरेचा एक अद्भुत संगम आहे.