Shashikant Shinde | गुंगी गुडिया वादावर शशिकांत शिंदे थेट बोलले; सुनेत्रा पवारांबाबत केलं मोठं विधान, म्हणाले…

राष्ट्रवादी काँग्रेस (शरदचंद्र पवार) पक्षाचे नेते शशिकांत शिंदे यांनी पक्षातील संघटनात्मक फेरबदल, प्रवक्त्यांच्या नियुक्त्या, “गुंगी गुडिया” वाद, अजित पवार प्रकरण आणि राज्यातील सध्याच्या राजकीय घडामोडींवर भाष्य करत विविध मुद्द्यांवर पक्षाची भूमिका स्पष्ट केली आहे. त्यांनी पक्षात नवीन कार्यकर्त्यांना संधी देण्याचा निर्णय घेतल्याचे सांगत, पक्षाची नव्याने उभारणी करण्यासाठी व्यापक फेरबदल सुरू असल्याचे स्पष्ट केले.

माध्यमांशी संवाद साधताना शशिकांत शिंदे म्हणाले की, पक्षामध्ये संघटनात्मक बदलांना सुरुवात झाली असून राज्यभरातील विविध पदाधिकारी आणि प्रवक्त्यांमध्ये फेरबदल करण्यात येत आहेत. आगामी 15 आणि 24 तारखेला पक्षाचे वरिष्ठ नेतृत्व बैठक घेणार असून, त्यामध्ये नवीन आणि जुन्या प्रवक्त्यांच्या नियुक्त्यांबाबत अंतिम निर्णय घेतला जाणार आहे. पक्षाची भूमिका सक्षमपणे मांडणारी नवीन कार्यकर्त्यांची फळी तयार करण्यावर भर दिला जाणार असल्याचे त्यांनी सांगितले.

“गुंगी गुडिया” या वादावर बोलताना शशिकांत शिंदे म्हणाले की, एखाद्या व्यक्तीवर अचानक मोठी जबाबदारी आल्यावर ती स्वीकारण्यासाठी वेळ लागतो. उपमुख्यमंत्री सुनेत्रा पवार या भविष्यात चांगले काम करतील, अशी अपेक्षा असल्याचे त्यांनी सांगितले. मात्र, त्यांनी वेळेत निर्णय घेतले आणि ठाम भूमिका मांडली तर टीकेला वाव उरणार नाही, असेही त्यांनी नमूद केले.
महिलांबाबत आदर राखण्याची भूमिका स्पष्ट करत शिंदे म्हणाले की, कोणत्याही महिला नेत्याबाबत अवमानकारक भाषा वापरणे योग्य नाही. राजकारणात मतभेद असू शकतात, पण महिलांचा सन्मान कायम राखला पाहिजे. याच भूमिकेतून आपण आपले मत मांडत असल्याचे त्यांनी स्पष्ट केले.

संजय काकडे यांच्या वक्तव्यावर प्रतिक्रिया देताना त्यांनी म्हटले की, शरद पवार यांनी अनेकांना राजकारणात मोठे केले आहे. त्यामुळे शरद पवार यांनी काय बोलावे किंवा बोलू नये, याबाबत सल्ला देण्याचा अधिकार कोणालाही नाही. त्यांनी आपल्या पक्षातील प्रश्नांकडे आधी लक्ष द्यावे, असा टोला त्यांनी लगावला. अजित पवार यांच्या अपघात प्रकरणाचाही उल्लेख करत शशिकांत शिंदे म्हणाले की, NEET पेपरफुटी प्रकरणात तातडीने कारवाई झाली, मात्र अजित पवार यांच्या अपघाताबाबत अद्याप अहवाल आलेला नाही. त्यांच्या पक्षातील वरिष्ठ नेत्यांनी या प्रकरणात ठाम भूमिका घेतली, तर सत्य लवकर समोर येईल, असे त्यांनी म्हटले.

अमोल मिटकरी यांनी शरद पवार यांची भेट घेतल्याच्या चर्चेबाबत शिंदे म्हणाले की, त्यांनी भेट घेतली असेल तर त्यात आनंदच आहे. मात्र, त्या भेटीनंतर नेमकी काय चर्चा झाली, हे समोर आल्यानंतरच त्यावर भाष्य करणे योग्य ठरेल. दरम्यान, पक्षाच्या प्रवक्तेपदाच्या नियुक्त्या रद्द करण्यामागे संघटन अधिक सक्षम करण्याचा उद्देश असल्याचे स्पष्ट करत शशिकांत शिंदे यांनी पक्षातील सर्व नेत्यांनी आणि पदाधिकाऱ्यांनी आपल्या भूमिकेचे भान ठेवून वक्तव्य करावे, अशी अपेक्षा व्यक्त केली. आगामी काळात राष्ट्रवादी काँग्रेस (शरदचंद्र पवार) पक्षात मोठे संघटनात्मक बदल होण्याचे संकेत त्यांच्या वक्तव्यातून मिळाले आहेत.