Kolhapur Protest | दिल्ली आंदोलनाचे महाराष्ट्रात पडसाद! कोल्हापुरात इंडिया आघाडीचा रास्ता रोको आंदोलन सुरू

दिल्लीतील जंतरमंतर येथे सुरू असलेल्या आंदोलनाला आता महाराष्ट्रातूनही मोठा प्रतिसाद मिळत आहे. पुणे, अमरावती आणि भिवंडीनंतर आता कोल्हापुरातही इंडिया आघाडीने आंदोलन छेडले असून, सोनम वांगचुक यांच्या समर्थनार्थ रस्त्यावर उतरून केंद्र सरकारविरोधात घोषणाबाजी करण्यात आली. कोल्हापुरातील मध्यवर्ती बस स्थानक परिसरात इंडिया आघाडीच्या वतीने रास्ता रोको आंदोलन करण्यात आले. या आंदोलनात विविध पक्षांचे पदाधिकारी, कार्यकर्ते आणि नागरिक मोठ्या संख्येने सहभागी झाले होते. आंदोलनामुळे काही काळ परिसरातील वाहतुकीवर परिणाम झाला.

दरम्यान, दिल्लीतील जंतरमंतर आंदोलनाला महाराष्ट्राच्या विविध भागांतून पाठिंबा मिळत असून, त्याचे पडसाद राज्यभर उमटताना दिसत आहेत. पुणे, अमरावती आणि भिवंडीनंतर आता कोल्हापूरही या आंदोलनात सहभागी झाल्याने आंदोलनाला आणखी बळ मिळाल्याचे चित्र आहे.

याशिवाय, कोल्हापूर येथील शिवाजी विद्यापीठ परिसरातही विद्यार्थ्यांकडून आणि विविध संघटनांकडून सोनम वांगचुक यांच्या समर्थनार्थ आंदोलन करण्यात आले. विद्यार्थ्यांनी शिक्षण व्यवस्था, नीट (NEET) पेपरफुटी प्रकरण आणि आंदोलनकर्त्यांच्या मागण्यांना पाठिंबा दर्शवत घोषणाबाजी केली.

सोनम वांगचुक यांच्या आंदोलनाला देशभरातून वाढता पाठिंबा मिळत असून, महाराष्ट्रातील विविध शहरांमध्ये सुरू झालेल्या आंदोलनांमुळे या प्रश्नावर राजकीय आणि सामाजिक वातावरण अधिक तापताना दिसत आहे.