Kolhapur Travels Accident | कोल्हापुरात चोरीची ट्रॅव्हल्स शिरोली टोल नाक्यावर आदळली; मोठे नुकसान, नेमकं काय घडलं?

कोल्हापूर शहरात अपघातांचे सत्र सुरू असतानाच शिरोली टोल नाक्यावर मध्यरात्री भीषण अपघात घडला. दुरुस्तीसाठी गॅरेजमध्ये ठेवण्यात आलेली ‘पारीख’ आणि ‘शंभो टूर्स अँड ट्रॅव्हल्स’ची बस अज्ञात चोरट्यांनी चोरून नेल्याची घटना उघडकीस आली आहे. मिळालेल्या माहितीनुसार, संबंधित ट्रॅव्हल्स दुरुस्तीकरिता गॅरेजमध्ये ठेवण्यात आली होती. मात्र, मध्यरात्री अज्ञात व्यक्तींनी ही बस चोरून कोल्हापूर शहराच्या दिशेने नेली. याची माहिती मिळताच गॅरेज मालकाने तत्काळ पाठलाग सुरू केला. पाठलाग सुरू असताना चालकाचे वाहनावरील नियंत्रण सुटल्याने बस, बंद असलेल्या शिरोली टोल नाक्यावरील कठड्यावर जोरात आदळली. या धडकेत टोल नाक्याच्या कठड्याचे नुकसान झाले असून बसचा पूर्णपणे चक्काचूर झाला आहे. सुदैवाने या अपघातात कोणतीही जीवितहानी किंवा दुखापत झालेली नाही. चोरी करून पळवून नेत असतानाच हा अपघात घडल्याने परिसरात खळबळ उडाली आहे.