माझ्या डॅडला न्याय द्या! प्रदीप पूर्णेकरांच्या मुलाचा टाहो; मुख्यमंत्र्यांना केलं भावनिक आवाहन, म्हणाले…

ठाण्यात झालेल्या गोळीबारात ठाकरे गटाचे विभागप्रमुख प्रदीप पूर्णेकर यांची हत्या झाल्याची धक्कादायक घटना समोर आली आहे. या घटनेनंतर पूर्णेकर यांच्या मुलाने टीव्ही ९ मराठीशी बोलताना आपली प्रतिक्रिया व्यक्त केली असून, वडिलांना न्याय मिळावा अशी मागणी केली आहे.

मुलाने सांगितले की, घटनेनंतर पोलिसांनी सुरुवातीला त्यालाच संशयित समजून चौकशीसाठी ताब्यात घेतले होते. या हत्येमागे नेमके काय कारण आहे, हे स्पष्ट नसून ते राजकीय किंवा निवडणुकीशी संबंधित आहे की अन्य काही, याबाबत अनिश्चितता असल्याचे त्याने नमूद केले. त्याने वडिलांनी यापूर्वी अनेक लोकांसाठी व्यसनमुक्तीसारखे सामाजिक कार्य केले होते, याची आठवण करून दिली. “ड्रग माफिया किंवा अन्य कोणी असू शकते,” अशी शक्यताही त्याने व्यक्त केली.

पूर्णेकर यांच्या मुलाने मुख्यमंत्री आणि उपमुख्यमंत्री यांना आवाहन केले आहे की, या प्रकरणाचा सखोल तपास करून दोषींना अटक करावी. “माझ्या डॅडला न्याय द्या. जे कोणी यात सामील आहेत, त्या सर्वांना अटक करा,” अशी कळकळीची विनंती त्याने केली. त्याचे वडील निष्ठावान शिवसैनिक होते आणि ते शिवसेनेसाठीच कार्यरत होते, असेही त्याने सांगितले. या कठीण प्रसंगात कुटुंबाला मदतीची आणि न्यायाची अपेक्षा असल्याचे त्याने स्पष्ट केले.