ठाणे स्टेशनवर रेल्वे कर्मचाऱ्यांचा मुजोरपणा? स्टेशनवर प्रचंड गर्दी असतानाही आरक्षित रेल्वेचे दरवाजे बंद

ठाणे स्टेशनवर मध्य रेल्वे कर्मचाऱ्यांच्या कथित मुजोरपणाचा प्रकार समोर आला आहे. १० तासांपासून रेल्वे सेवा विस्कळीत असताना, कर्मचाऱ्यांसाठी असलेला एक लोकल डबा आतून बंद ठेवण्यात आला होता, तो ९० टक्के रिकामा असतानाही त्याचे दरवाजे उघडले गेले नाहीत. यामुळे सामान्य प्रवाशांना मोठ्या गर्दीचा सामना करावा लागला. मनसे नेते अविनाश जाधव यांनी या घटनेवर तीव्र प्रतिक्रिया दिली आहे.

जाधव यांनी ही “हास्यास्पद” आणि “दुर्भाग्यपूर्ण” गोष्ट असल्याचे म्हटले आहे. ठाणे आणि आसपासच्या भागातून दररोज ९० लाखांहून अधिक लोक प्रवास करत असताना, कर्मचाऱ्यांसाठी विशेष डबे देणे हे अयोग्य असल्याचे त्यांनी नमूद केले. ते म्हणाले, “या सगळ्या ज्या ट्रेन चालतात, त्या सर्वसामान्य माणसांच्या टॅक्स आणि तिकिटांमधून चालतात. मला असं वाटतं, अशी व्हीआयपी ट्रीटमेंट बंद केली पाहिजे.” बंद डब्यात बसलेल्या कर्मचाऱ्यांवर १०० टक्के कारवाई झालीच पाहिजे, अशी मागणी त्यांनी केली. मध्य रेल्वे प्रवाशांना गृहीत धरत असल्याचा आरोपही जाधव यांनी केला.