ठाकरेंच्या शिवसेनेला शिवाजी पार्कवर दसरा मेळाव्यासाठी अखेर परवानगी

ठाकरेंच्या शिवसेनेला यंदाचा दसरा मेळावा शिवाजी पार्क मैदानावर घेण्याची परवानगी मिळाली आहे. 20 ऑक्टोबर रोजी दसऱ्याच्या दिवशी हा पारंपरिक मेळावा आयोजित केला जाणार आहे. शिवसेना (उद्धव बाळासाहेब ठाकरे) पक्षाने जुलै महिन्यातच या परवानगीसाठी मुंबई महानगरपालिकेकडे अर्ज केला होता. अनेक दिवसांच्या प्रतीक्षेनंतर, अखेर महानगरपालिकेकडून मेळाव्यासाठी हिरवा कंदील मिळाला असल्याची सूत्रांची माहिती आहे.

मुंबई महानगरपालिकेच्या जी साऊथ वॉर्ड कार्यालयाकडून लवकरच परवानगीचे अधिकृत पत्र ठाकरेंच्या शिवसेनेला सुपूर्द केले जाईल. या पत्रामध्ये मेळाव्यासाठीच्या नियम व अटींचा उल्लेख असेल. शिवसेनेत फूट पडल्यापासून, दसरा मेळाव्याच्या स्थळावरून दोन्ही गटांमध्ये वारंवार संघर्ष पाहायला मिळाला आहे. त्यामुळे यंदा शिवाजी पार्कवर ठाकरेंच्या शिवसेनेचा मेळावा होणार असल्याने शिवसैनिकांमध्ये उत्साहाचे वातावरण आहे. गणेशोत्सवानंतर शिवसैनिकांना दसरा मेळाव्याची विशेष आतुरता असते, अशा परिस्थितीत परवानगी मिळाल्याने कार्यकर्त्यांचा उत्साह वाढला आहे.